Twitter icon
Facebook icon
Google+ icon
LinkedIn icon
YouTube icon

Leading News

റാഫേൽ ഇടപാട് ,അഴിമതിക്കേസ്സെടുക്കണമെന്ന് സി വി സിയോട് കോൺഗ്രസ്സ്

ന്യൂഡൽഹി: റാഫേൽ ഇടപാടിൽ അഴിമതിക്ക് കേസ്സെടുക്കണമെന്നാവശ്യപ്പെട്ട് കോൺഗ്രസ്സ് നേതാക്കൾ സെൻട്രൽ വിജിലൻസ് കമ്മീഷണർക്ക് നിവേദനം നൽകി. പൊതുമേഖല സ്ഥാഥാപനമായ എച്ച് എ എല്ലിന് കരാർ നൽകാതെ സ്വകാര്യ സ്ഥാപനമായ റിലയൻസ് ഡിഫൻസിന് കരാർ നൽകിയതിലൂടെ രാജ്യത്തെ പൊതു ഖജനാവിന് കോടികളുടെ നഷ്ടം വരുത്തിവെച്ചുവെന്നും രാജ്യസുരക്ഷ അപകടത്തിലാക്കിയെന്നും നിവേദനത്തിൽ ആരോപിക്കുന്നു.

ഫ്രാങ്കോ മുളയ്ക്കൽ ഒക്ടോബർ 6 വരെ റിമാൻഡിൽ

കോട്ടയം: കന്യാസ്ത്രീയെ പീഡിപ്പിച്ചുവെന്ന കേസ്സിൽ അറസ്റ്റിലായ ജലന്തർ രൂപത ബിഷപ്പ് ഫ്രാങ്കോ മുളയ്ക്കലിനെ പാലാ മജിസ്ട്രേറ്റ് കോടതി 12 ദിവസത്തേക്ക് റിമാൻഡ് ചെയ്തു. രണ്ടു ദിവസത്തെ റിമാൻഡ് കാലാവധി കഴിഞ്ഞതിനെത്തുടർന്ന് ഇന്ന് കോടതിയിൽ ഹാജരാക്കിയപ്പോഴാണ് ഒക്ടോബർ 6 വരെ റിമാൻഡിൽ വിടാൻ കോടതി ഉത്തരവിട്ടത്. തുടർന്ന് വൈദ്യ പരിശോധനക്ക് ശേഷം ഫ്രാങ്കോയെ സബ് ജയിലിലേക്ക് മാറ്റി. ഞായറാഴ്ച ബിഷപ്പിനെ കന്യാസ്ത്രീയെ പീഢിപ്പിച്ചുവെന്ന് പറയപ്പെടുന്ന കുറുവിലങ്ങാട് സെന്റ് ഫ്രാൻസിസ് മിഷൻ ഹോമിൽ കൊണ്ടു പോയി തെളിവെടുത്തിരുന്നു.

ആയുഷ്മാൻ ഭാരത് പദ്ധതിക്ക് തുടക്കമായി

റാഞ്ചി: പ്രധാനമന്ത്രിയുടെ ജനആരോഗ്യ പദ്ധതിയായ " ആയുഷ്മാൻ ഭാരത് " പ്രധാനമന്ത്രി നരേന്ദ്രമോദി റാഞ്ചിയിൽ നടന്ന ചടങ്ങിൽ വെച്ച് ഉൽഘാടനം ചെയ്തു. സർക്കാർ തലത്തിലുള്ള ലോകത്തിലെ തന്നെ ഏറ്റവും വലിയ ആരോഗ്യ പദ്ധതിയാണ് ആയുഷ്മാൻ ഭാരത് സമൂഹത്തിന്റെ താഴെക്കിടയിലുള്ള 50 കോടി ജനങ്ങൾക്ക് ഇതിന്റെ പ്രയോജനം കിട്ടും. ഹൃദയം, വൃക്ക, കരൾ എന്നിങ്ങനെ 1300 തരത്തിലുള്ള രോഗങ്ങൾക്ക് പദ്ധതിയിലൂടെ ചികിത്സ ലഭിക്കും.13000 ആശുപത്രികൾ പദ്ധതിയുടെ ഭാഗമാകും .

ആം ആദ്മി പാർട്ടി 100 സീറ്റിൽ മത്സരിക്കും

ന്യൂഡൽഹി: വരുന്ന ലോകസഭാ തെരഞ്ഞെടുപ്പിൽ ആം ആദ്മി പാർട്ടി 100 സീറ്റുകളിൽ മത്സരിക്കുമെന്ന് എ.എ പി പാർട്ടി നേതാക്കൾ പറഞ്ഞു. 25 സീറ്റിൽ വിജയം ഉറപ്പിക്കാനാണ് പാർട്ടി ലക്ഷ്യമിടുന്നത് . ഡൽഹിക്ക് പുറമെ പഞ്ചാബ് ,ഹരിയാന ഗുജറാത്ത്, ബിഹാർ ,യു പി ,രാജസ്ഥാൻ, മദ്ധ്യപ്രദേശ് ,ഛത്തീസ്ഗഢ്
എന്നിവിടങ്ങളിൽ മത്സരിക്കാനാണ് എ എ പി ലക്ഷ്യമിടുന്നത്. നിലവിൽ പഞ്ചാബിൽ നിന്ന് നാല് ലോകസഭാ സീറ്റുകൾ എ എ പി ക്ക് ഉണ്ട്

റാഫേൽ ഇടപാടിൽ മോദി അഴിമതി നടത്തിയെന്ന് രാഹുൽ ഗാന്ധി

ന്യൂഡൽഹി: റാഫേൽ യുദ്ധവിമാന ഇപാടിൽ അനിൽ അംബാനിയെ സഹായിച്ച പ്രധാനമന്ത്രി നരേന്ദ്ര മോദി അഴിമതി നടത്തിയെന്നും രാജ്യത്തിന്റെ കാവൽക്കാരൻ കൊള്ളക്കാരനാവുകയാണെന്നും കോൺഗ്രസ്സ് അദ്ധ്യക്ഷൻ രാഹുൽ ഗാന്ധി ആരോപിച്ചു. 38 റാഫേൽ ജറ്റ് യുദ്ധവിമാനങ്ങൾ വാങ്ങാൻ ഫ്രഞ്ച് കമ്പനിയായ ഡാസ്സോൾട്ട് ഏവിയേഷനുമായി കരാറുണ്ടാക്കാൻ അനിൽ അംബാനിയുടെ റിലയൻസ് ഡിഫൻസിന്റെ പേര് നിർദ്ദേശിച്ചത് ഇന്ത്യൻ സർക്കാരാണെന്ന് മുൻ ഫ്രഞ്ച് പ്രസിഡണ്ട് ഫ്രാൻകോയിസ് ഹോലാൻറ് വെളിപ്പെടുത്തിയതായി ഒരു ഫ്രഞ്ച് മാധ്യമം റിപ്പോർട്ട് ചെയ്തതിന് പിന്നാലെയാണ് രാഹുലിന്റെ ആരോപണം. എന്നാൽ രാഹുലിന്റെ ആരോപണം ബി.ജെപി നിഷേധിച്ചു.

ഫ്രാങ്കോ മുളയ്ക്കലിന്റെ ജാമ്യാപേക്ഷ തള്ളി

കൊച്ചി: കന്യാസ്ത്രീയെ പീഡിപ്പിച്ചുവെന്ന കേസ്സിൽ അറസ്റ്റിലായ ജലന്തർ രൂപത ബിഷപ്പ് ഫ്രാങ്കോ മുളയ്ക്കലിന്റെ ജാമ്യാപേക്ഷ പാലാ മജിസ്ട്രേറ്റ് കോടതി തള്ളി. തിങ്കളാഴ്ച ഉച്ചവരെ ബിഷപ്പിനെ പോലീസ് കസ്റ്റഡിയിൽ വിട്ടു ഈ കാലയളവിൽ വിവിധ സ്ഥലങ്ങളിൽ കൊണ്ടുപോയി തെളിവെടുപ്പ് നടത്താനാണ് പോലീസിന്റെ നീക്കം. ഇന്നലെ അറസ്റ്റിലായ ബിഷപ്പിനെ നെഞ്ചുവേദനയനുഭവപ്പെടുന്നുവെന്ന പരാതിയെത്തുടർന്ന് കോട്ടയം മെഡിക്കൽ കോളേജിൽ പ്രവേശിപ്പിച്ചിരുന്നു. പരിശോധനയിൽ ആരോഗ്യ പ്രശ്നമില്ലെന്ന് കണ്ടെത്തിയതിനെത്തുടർന്ന് ഇന്ന് രാവിലെ ഡിസ്ചാർജ് ചെയ്ത് നേരെ പാല മജിസ്ട്രേറ്റ് കോടതിയിലേക്ക് കൊണ്ടുപോവുകയായിരുന്നു.

ഗോവയിൽ സർക്കാർ രൂപീകരിക്കാൻ അവകാശമുന്നയിച്ച് കോൺഗ്രസ്സ്

പനാജി: ഗോവയിൽ സർക്കാർ രൂപീകരിക്കാൻ അവകാശമുന്നയിച്ച് കോൺഗ്രസ്സ് പാർട്ടി രംഗത്തെത്തി. 40 അംഗ സഭയിൽ സർക്കാർ രൂപീകരിക്കാൻ ആവശ്യമായ 21 അംഗങ്ങളുടെ പിന്തുണ തങ്ങൾക്കുണ്ടെന്ന് നിയമസഭയിലെ പ്രതിപക്ഷ നേതാവ് ചന്ദ്രകാന്ത് കവലേക്കർ പറഞ്ഞു, 16 അംഗങ്ങളുള്ള കോൺഗ്രസ്സാണ് നിയമസഭയിലെ ഏറ്റവും വലിയ ഒറ്റക്കക്ഷി . മന്ത്രിസഭരൂപീകരിക്കാനുള്ളഭൂരിപക്ഷമുണ്ടെന്ന്കാണിച്ച് കോൺഗ്രസ് അംഗങ്ങൾ ഗവർണ്ണർ മൃദുല സിൻഹയെക്കണ്ട് അവകാശമുന്നയിച്ചിട്ടുണ്ട്.

മുത്തലാഖ് ഓർഡിനൻസിന് മന്ത്രിസഭയുടെ അംഗീകാരം

ന്യൂഡൽഹി: മുത്തലാഖ് ഓർഡിനൻസിന് കേന്ദ്ര മന്ത്രിസഭ അംഗീകാരം നൽകി. ഇതോടെ മൂന്ന് തവണ തലാഖ് ചൊല്ലി വിവാഹബന്ധം വേർപെടുത്തുന്ന മുസ്ലിം സമുദായത്തിലെ മുത്തലാഖ് എന്ന സമ്പ്രദായം കുറ്റകരമാക്കുന്ന നിയമം പ്രാബല്യത്തിൽ വന്നു. മുത്തലാഖ് കുറ്റകരമാക്കുന്ന ബില്ല് ലോകസഭ പാസ്സാക്കിയിരുന്നുവെങ്കിലും ഭൂരിപക്ഷമില്ലാത്തതിനാൽ രാജ്യസഭയിൽ ബില്ല് പാസ്സായിരുന്നല്ല ഈ സാഹചര്യത്തിലാണ് കേന്ദ്ര സർക്കാർ ഓർഡിനൻസ് കൊണ്ടുവന്നത്. മുത്തലാഖ് സുപ്രീം കോടതി കഴിഞ്ഞ വർഷം നിരോധിച്ചിരുന്നു.

ആര് അധികാരത്തിൽ വരുന്നൂ എന്നത് ആർ എസ് എസ്സിന് പ്രശ്നമല്ല --മോഹൻ ഭഗവത്

ന്യൂഡൽഹി: രാജ്യത്ത് ആര് അധികാരത്തിൽ വരുന്നൂവെന്നത് രാഷ്ട്രീയ സ്വയം സേവക് സംഘത്തിന് പ്രശ്നമല്ലെന്ന് ആർ എസ് എസ് സർസംഘചാലക് മോഹൻ ഭഗവത് പറഞ്ഞു. ഡൽഹിയിൽ നടക്കുന്ന ആർ എസ് എസ്സിന്റെ മൂന്നു ദിവസത്തെ ശിബിരത്തിൽ ആമുഖ പ്രസംഗം നടത്തുകയായിരുന്നു അദ്ദേഹം. ജനാധിപത്യത്തിൽ ഊന്നി പ്രവർത്തിക്കുന്ന സംഘടനയാണ് ആർ എസ് എസ്. പ്രവർത്തകർക്ക് അവരുടേതായ അഭിപ്രായ സ്വാതന്ത്ര്യം സംഘം അനുവദിക്കുന്നു. ഒരു സംഘടനയേയും ആർ എസ് എസ് നിയന്ത്രിക്കുന്നില്ല ,ബി.ജെ പിയെ നിയന്ത്രിക്കുന്നത് ആർ എസ് എസ്സാണ് എന്ന വിമർശനത്തോട് പ്രതികരിക്കവെ ഭഗവത് വ്യക്തമാക്കി.

മോഹൻലാലും ബി ജെ പി സ്ഥാനാർത്ഥി പട്ടികയിൽ

തിരുവനന്തപുരം: തെരഞ്ഞെടുപ്പ് മുന്നിൽക്കണ്ട് നേതാക്കൾക്കും പ്രവർത്തകർക്കും പെരുമാറ്റച്ചട്ടം നിർദ്ദേശിച്ച ബിജെപി നേതൃത്വം ജനസമ്മതിയുള്ള താരങ്ങളെ സ്ഥാനാർത്ഥിയാക്കാൻ ലക്ഷ്യമിടുന്നു. മോഹൻലാൽ, അക്ഷയ് കുമാർ, മാധുരി ദീക്ഷിത്, വിരേന്ദ്ര സേവാങ്ങ്, സണ്ണി ദിയോൾ എന്നീ താരങ്ങളാണ് ബിജെപിയുടെ സ്ഥാനാർത്ഥിപട്ടികയിൽ ഉള്ളത്. മോഹൻലാലിനെ തിരുവനന്തപുരം ലോകസഭാ സീറ്റിൽ മത്സരിപ്പിച്ചാൽ സീറ്റ് പിടിച്ചെടുക്കാൻ കഴിയുമെന്ന കണക്ക് കൂട്ടലിലാണ് ബിജെപി നേതൃത്വം.

Alpha Media , B.34/6 , Kendriya Vihar
Kharghar , pin 410 210
Navi Mumbai , Maharashtra
India.
Tel : 022 27740 713
Mob : +91 9819 1039 28
Email : info@mumbaimalayali.com

Mumbai Malayali.in

© Alpha Media, Navi Mumbai 2014-2015. All rights reserved.

Designed & Maintained byAxon Communications